شلبكية سريعة
الرئيسية / كتّاب سبيل /  (امي كالتلي ) قالت لي أمي .. الدكتور شاهر عفوني .

 (امي كالتلي ) قالت لي أمي .. الدكتور شاهر عفوني .

العدد 59- ص20

 

كتب الدكتور : الدكتور شاهر عفوني

بعد عيد رمضان السنة : الدنيا شوبت (الجو حار جدا).. الله يجيرنا (يعافينا ويرحمنا) من شوب هالسنة.. الدنيا فاتحه باب جهنم .رايحات الزيتونات اتشتوا (يكتوا : يسقطوا الحبات) من هـ الشرقيه (الريح الشرقية).


هالصيف السنه ما في ولا نسمة هوا ..بِأذن ( يؤذن) المغرب وهي إمتشتمي (إمْكَتْمي : ما في ريح ) ..ربنا بعذبنا  في هالدنيا ب هالشوب..السنة تشثرت (كَثُرتْ)  الافراح ..الله يخلي الشباب ويهنيهم كل ليلة في فرح على الدوار..وكل يوم في جاهة ..وكل ليلة في حِنّا لعروس..وما عارف الواحد يلحق وين يروح ولا وين ما يروح ..ما بصير الواحد ما يشارك كل هالناس في افراحهم ..الله لا يجيب موت وما يعطل هالافراح ..بدنا نفرح ..زمان ما فرحنا في هـالبلد.. وفي رمضان في شهر رمضان ما حدا بعرس ..ولا بعمل عروس ولا جاهات .. السنة من الشوب (من درجة الحرارة العالية)  نزل البطيخ والشمام بَدْري (مبكرا) ..بطيخ جنين البعلي مثل الستشر (السكر)زمان بكينا إنّْزل  البطيخة في البير منشان نبردها …هالايام كل الناس عندها ثلاجات ..السنة بدري نزل التين والصبر والعناب من هالشوب..والموسم برضو للفقوس وللخيار البلدي وللبامية وللملوخية ..وشو بدنا نلحق تنلقح تخزين المونه..ما لحقنا نرتاح من طبيخ الجبنة وإدحبر اللبنه وفتل المفتول وطبيخ البندورة.السنة إعملنا ثلاث مرطبانات إخراج (رب بندوره)  ومونا فريتشي( فريكه) وعبينا الخابية قمح …ومَوَنا زعتر .. هو في الشتا شو بدي الواحد يوكل ..غير  من اللي إمونوا..
وكلو يهون واليهود اللي منعوا الناس من الصلاة في الاقصى هالايام ..كال بدهم يفتشوا كل زله(رجل) ومره (إمرأة) قبل الصلاة وبعد الصلاه ليش ما بَعْرف ؟
وبيقولوا الناس انهم اليهود حطوا تفتيش ع كل بوابات الاقصى والصخرة ..و بدهم يعملوا في الاقصى زي ما عملوا في الخليل في الحرم الابراهيمي ..صار كل واحد بدوا يصلي في الحرم الابراهيمي  لازم يمر من المعاطة معاطة الجاج (حاجز التفتيش الالكتروني)  ..
– قَصْدِك يمّا البوابات الالكترونية
= اه يمّا سموها شوما بدكم تسموها مهي زي معاطة الجاج ..
بدهم يدخلوا كل واحد بصلي في الاقصى على معاطة الجاج ..
واليوم في صلاه  وبتشره(بكرة) ما في ..واليوم للعرب وبتشره( بكرة) لليهود ..وبدال ما يدخل يوم الجمعة الوف بدخلوا متين..والجمعة هذي بدخلوا اللي من نابلس والجمعة الجاي اللي من جنين ..وبتشرا (بكرا) بيقولوا ما بدنا تاعين ال 48  وما بدنا الا أتشم (أكم) واحد بس يصلي : قول ثلاثميه .. وبِخَلُّوا المسجد  الاقصى حزين وفارغ من اهله ..ومن اللي بدهم يصلوا فيه..وبتشره ( بكره) اليهود والمستوطنين بيجوا  يتمسخروا في الاقصى ..هاي اللي انا خايفن منو  يصير ..وهيي اللي اليهود بخططيلوا..
القدس صار فيها زي بنت شيخ العرب اللي انذلت في دار اهلها .. اه يا يما على القدس واهلها..
وبدت امي تغني بصوت حزين على القدس وعلى حالنا..وتقول:

يا بنت شيخ العرب يا إم العبا“1“ السودا
وابوك شيخ العرب حاكم على العوجا“2“..

 

يا بنت شيخ العرب يا إم العَبا الزرقا
وابوك شيخ العرب حاكم على البلقا ”3“..

 

إمعلقه في الجبل يا رجل شناره ”4“
وكم مليحه مع الانذال يا خساره..

 

ومعلقة في الجبل يا رجل زرعيه ”5“
وكم مليحة مع الانذال منسيه..

 

لَلَمْلِمَكْ ”6“ يا بحر في قمع بلوطه ”7“
وكم مليحه مع الانذال مربوطه..

 

لَلَمْلِمَكْ  يا بحر في قُمع زيتونه
وكم مليحة مع الانذال مرهونه..

 

ع اليوم لـَ وِنُو الوطن ينشال فوق إجْمال
لَرْحَل وآجي عندكم يا هاديين البال..
***
(١) العبا: العباية
(٢) العوجا : بجانب اريحا
(٣) البلقاء : لواء البلقاء ومركزه السلط
(4) شناره : الشنار : الحجل
(5) زرعيه : نوع من انواع الطيور المألوفه في فلسطيني وهي القبرة
(6)للملمك : لاجمعك
(بلوطه) :شجرة البلوط

***

شاهد أيضاً

كيف تتحقق من دقة وصحة المعلومات الصحية عبر الإنترنت؟

  العدد 55 ص13 من ساخر سبيل الشهرية . كتبت: هناء الرملي. أصبح استخدام الانترنت …