شلبكية سريعة
الرئيسية / كتّاب سبيل / حوار مع صديق متشدد

حوار مع صديق متشدد

فاكر سبيل P21

انسان سبيل

كتب : معتز ابو كلام .. Moutaz214@yahoo.com 

***

أنا》 يسعد مساك صديقي كيفك؟

هو》 واااعليكم السلام ورحمة الله وبركاته.

أنا》 اااي مشيها هلئ،،، قلتلك يسعد مساك قلي ومساك…لازم تدقق يعني.

هو》 لا.. لا يجوز يا أخي.. هذه تحية المسلمين. ينبغي أن تقول ااالسلام عليكم. وإلا تكون تتشبه بغير المسلمين.

أنا》 طيب..متل ما بدك. المهم طمني شو صار معك؟؟ انشالله سجلت الأولاد بالمدرسة؟؟

هو》 ااالحمد لله. لقد أنعم الله عليهم وسجلتهم بالمدرسة الإسلامية.

أنا》 بس يا حجي، المدارس الإسلامية مكلفة!! وأنا شايفها صارت تجارة بصراحة لدى البعض والمدارس الكندية مجانية وتعليمها أحسن.

هو》 لا.. لا أريدهم أن يختلطوا بأولاد من غير دين. ولا أريدهم أن يحضروا دروس الرياضة المختلطة والموسيقا..

أنا》 بس والله هيك عم تصعب عليهم العيشة كتير. لازم الأولاد يختلطوا بالمجتمع يلي عايشين فيه وإلا سيصابوا بالإكتئاب وأمراض نفسية لها أول مالها أخر. والله حرام عليك..سماع مني خليهم يعيشوا طفولتهم بشكل عفوي وكل واحد على دينه الله يعينه والبركة فيكون بالبيت مالكون مقصرين.. صلاة وحفظ قرآن والسبت والأحد عندهم دروس الدين وهيك بكفي وزيادة، وإلا،، الأولاد بكرا بتطلع عن دينها.. سماع مني كل شي بزيد عن حده ينقلب ضده.

هو》 اااتقي الله يا رجل. هؤلاء أمانة في أعناقنا، ولازم نحميهم من سموم هذه المجتمعات وعاداتهم الفاااجرة. ألم ترى الإختلاط والتفلت وقلة الحياااء والمروءة عندهم!!!؟؟؟.

أنا》 يعني ببلادنا برأيك الوضع أحسن!! عالأقل هون الناس تتعامل مع بعضها بصدق وأمانة وما في فساد!!
ولا رشوة!! ولا محسوبية!! ولا فلان مدعوم ولا فلان ابن مسؤول ولا ضراب السخن. لك بكفي هون أنو الكل تحت القانون من رئيس الوزراء، تسلملي عينه، لأصغر موظف بالبلد. وبعدين بخصوص التفلت وقلة الحياء،  يعني بصراحة ماشفت مشاهد كتير تخدش الحياء!!! يعني نااادرا ما شوف واحد عم يضم وحده أو عم يقبلها. وعلى كلا، لازم مانحصر الأدب والشرف والمروءة بجسم المرأة ولبسها وتفلتها وبس… أنا برأيي قليل الشرف والمروءة وعديم الأخلاق والترباية هو يلي بينصب وبيحتال عالناس وبياكل أموالها وحقوقها.. فحاجتنا تخلف وتعصب بئا من شان يلي خلقك!!!

هو》 استغفر الله العظيم مما تقول!!!
ماذا جرى لعقلك يا رجل!!! استهدي بالله.. لقد خرجت عن الأصول والفصول واستبحت المحظور!!! هذا الكلام يغضب الله ورسوله والعياذ بالله!!؟؟ استغفر ربك سبع مرات!!!

أنا》 يعني بالله عليك أن تقنعني، أيهما أشد عند الله، أن تمشي إمرأة سافرة في الأسواق تمسك بيد صديقها، أو أن تمشي فتاة صغيرة جائعة خائفة بثياب رثة تتسول على أبواب الجوامع وفي الطرقات.  بشرفك تجاوبني..لك يا بني آدم، في ناس في بلادنا من الجوع صاروا عم ياكلوا بقايا الطعام من حاويات الزبالة وأنت هون عم تتشدد وتتعصور إذا شفت وحدة لابسه شورت أو فيزون أو مشنغله رفيقها. لك والله شي بيحط العقل بالكف!!!

هو》 أعوذ بالله منك ومما اسمع. والله إني أراك قد بعت دينك بعرض من الدنيا قليل، وقد قل أدبك وانتزعت أخلاقك والعياذ بالله!! يا ويلك من الله!!!

أنا》 أي طول بالك علينااا.. والله معك حق، يمكن قل أدبي شوي بس الحمد لله إنسانيتي ما قلت، بالعكس زادة أكتر..أكتر بكتير

هو》 لا..لا..كلامك غلط بغلط ولا ينسجم مع الشرع ولا يتماشا مع عاداتنا وتقاليدنا والبيئة التي تربينا فيها.

أنا》 سيدي…ما بتبطل عادتك ابدا. ماسكها حنبلية من عمرك. ومفكر حالك أنت الفهمان والناس كلها ما بتفهم… لك بدي أفهم شو جاااابك أنت وأمثالك لهالبلاد!!؟ فهمني!!!؟؟؟

هو》 بصراحة يا صاحبي.. لولا هذه المساعدات التي  يعطونا إياها. من رعاية صحية وأدوية مجانية ورواتب شهرية وخدمات اجتماعية مجانية. لماااا أدرت وجهي لهذه البلاد البته البته.

أنا》 لك تضرب أنت والبته تبعك شو أنك بتسود الوش صحيح!! أكال نكار كمان!! قاعد بحضنون وعم تنتف بذقنهم!!
لك قول كتر خيرهم عالأقل!!!! الواحد أبوه اليوم عم يتخلى عنه وعم يقله روح دبر راسك ما معي أعطيك.. فعلا في ناس بهالبلد مابيستحو !!!! لك كان لازم ياخدوكون تعيشوا بجبال تورابورا كنتوا تأقلمتوا هنيك أكتر.

هو》 يااا أخي.. هذه البلاد ربنا سبحانه وتعالى سخرها لنا. وهذه النعم والمساعدات تعتبر من الغنائم.. وأسأل الله العلي القدير، أن يريني بعيني هذه يوم تفتح هذه البلاد على أيدينا عاجلا غير أجلا وما ذلك على الله بعزيز.

أنا》 تنقلع عينك وماتشوف فيها ان شالله!!!! حاطط عينك على بلادهم كمان!! ههههه..لك ما بتستحي تحكي هالحكي!!!!

هو》قاااااتلك الله..ماذا تقول!!! أتكره إعلاء كلمة الله في بلاد الشرك!!!! والله إن هذا لكفرا بواحا وإني لأحسبك خرجت من الملة وكفرت بدين محمد!!!

أنا》لك يا بني آدم..قبل ما تطلعني من دين محمد…خليني فهمك شغلة.. إعلاء كلمة الله عز وجل لا تكون بقول لا إله إلا الله وأنت حامل ساطور عم ترهب الناس الأمنة وتخوفها!! إعلاء كلمة الله تكون بنشر العدل والمساواة والتسامح والمحبة بين كل الناس. إعلاء كلمة الله يا فهمان، تكون لما بتحمي أرواح الناس ودمائهم وأعراضهم وممتلكاتهم. إعلاء كلمة الله تكون بإعمار هالأرض يلي الله استخلفنا فيهاااا. بعدين يا أبو عبدو الشغلة مو بالشعارات وبس.. شوف عندك أغلبية الدول العربية والإسلامية  تدعي بأنها تعبد الله الواحد القهار وتعلي كلمته، والمآذن ماشالله شغالة 24 ساعة وكله بقول لا إله إلا الله ولكن على أرض الواقع شوف شو يلي عم يصير.. ماحدا بخاف الله، كله مافي رحمة وكله عم ياكل بعضه البعض.. برأيك هيك بكون إعلاء كلمة الله..لك وين الرعاية الصحية وين حقوق الإنسان وين الكرامة وين الخدمات الإجتماعية والطبابة المجانية.. كله ضحك عاللحى، وعند ربك مابيضيع شي. أنا برأي بلاد متل كندا والدول الإسكندنافية حاليا هنن المستخلفين في الأرض وهنن يلي عم يعمروها. ..وَإِن تَتَوَلَّوْا يَسْتَبْدِلْ قَوْمًا غَيْرَكُمْ ثُمَّ لَا يَكُونُوا أَمْثَالَكُم .. صدق الله العظيم. بعدين قبل ما أنسى بدي أسألك سؤال !!؟؟؟ دخلك إذا الله أنعم عليكم  وفتحتوا هالبلاد.. يا ترى ناويين تعطوا الناس مساعدات متل ماهنن بيعطوا، ولا.. بدكون تجبروهم يدفعوا الجزية وهم صاغرون!! قايم روح أحسن شي. فار دمي منك.. ماعاد اتحمل!!!

هو》 إلى أين ذاهب ؟؟ لم نشرب الشاي بعد.

أنا》 اشربه لوحدك.. رفعتلي ضغطي  بحديثك وبرادتك اليوم.. بشوفك بعدين خاطرك..

هو》 وااااعليكم السلام ورحمة الله وبركاته..

أنا》 الله لا يسلم فيك ولا عضمة!! قلتلك خاطرك..

هو》هههههه.

***

 

 

 

 

شاهد أيضاً

من التراث الشعبي الفلسطيني.. كالت لي أمي .

من ص20 فاكر سبيل العدد 56 من جريدة ساخر سبيل كالت لي امي   كتب …